Ўзбекистон мустақиллигининг 24 йиллиги арафасида Бухоро вилояти ички ишлар идоралари ходимларидан бир гуруҳи 43 оилага мўлжалланган кўпқаватли замонавий турар жойларга кўчиб кирди.
Шу муносабат билан ташкил этилган тадбирда Ўзбекистон Республикаси ички ишлар вазирининг ўринбосари А.Мирзаев ва бошқалар Ўзбекистон Президенти раҳнамолигида ички ишлар тизимида амалга оширилаётган изчил ислоҳотлар самарасида соҳа фаолияти такомиллашиб, унинг моддий-техник базаси мустаҳкамланиб бораётгани, халқимиз тинчлиги ва хавфсизлигини таъминлашга камарбаста бўлаётган осойишталик посбонлари ҳар томонлама қўллаб-қувватланаётганини таъкидлади.
Кейинги йилларда Бухоро вилоятида осойишталик посбонларини ижтимоий ҳимоя қилишга қаратилган ишлар кўлами янада кенгайди. Вилоят марказидаги иккита турар жой биноси реконструкция қилиниб, соҳа ходимлари учун хизмат уйлари сифатида берилиши ҳам кўрсатилаётган юксак ғамхўрлик ифодасидир. Мазкур объектларда бош пудратчи “Бухоро монтажстройсервис технология” шўъба корхонаси лойиҳа-смета қиймати 2 миллиард сўмликдан зиёд бўлган бунёдкорлик ишларини амалга оширди.
Тадбирда ички ишлар ходимларига хизмат уйлари калитлари тантанали равишда топширилди.
"Давлатимиз томонидан кўрсатилаётган эътибордан, уй-жой шароитимиз яхшиланганидан жуда хурсандмиз. Шу пайтга қадар Вобкент туманидан қатнаб ишлардим. Мана энди оилам ҳам Бухоро шаҳрида яшайди. Хизмат уйимизда барча қулайликлар яратилган", – дейди вилоят ички ишлар бошқармаси ҳузуридаги Қўриқлаш бошқармаси 1-алоҳида милиция батальони шахсий таркиб билан ишлаш бўйича катта инспектори, сержант Алишер Тўраев.