Россиянинг биринчи рақамли маркетологи Игорь Манн Avtotest компаниясининг расмий маслаҳатчиси бўлди.
Бу ҳақдаги хабар компаниянинг Фейсбукдаги саҳифасида пайдо бўлди. Avtotest компанияси жамоаси билан уюштирилган шахсий учрашувда Игорь Борисович амалга оширилаётган лойиҳалар билан танишиб чиқди. У, шунингдек, Avtotest томонидан йўлларда хавфсизликни таъминлаш борасида олиб борилаётган ишларга ўз муносабатини ва таклифларини билдириб ўтди.
“Avtotest’нинг Игорь Манн билан ҳамкорлиги биринчи рақамли маркетологнинг кўплаб китобларида баён этилган асосий қоидаларга риоя қилинишини ифодалайди. Бу мижозларга ҳурмат билан муносабатда бўлиш, режалаштириш, қулайликлар яратиш, сифатли хизмат кўрсатиш, бизнеснинг фойда олишга эмас, мижозлардан миннатдорчилик олишга йўналтирилганлигидир”, – дейилади компаниянинг хабарномасида.
Игорь Манн Россиянинг энг машҳур маркетинг мураббийи бўлиб, у бу фаолият билан 1993 йилдан буён шуғулланади. Манн Россия маркетологлар гильдияси версиясига кўра йил консультанти ҳисобланади.
Шунингдек, у “100 фоизлик маркетинг”, “Бюджетсиз”, “Маркетинг Машина” бестселлерларининг муаллифидир. Айни пайтда у “Манн, Иванов ва Фербер” нашриётининг, “Ақл кучи”, “Маркетинг Машина”, PushBooks интернет лойиҳаларининг шериги ва ҳаммуассисидир. АҚШ, Европа ва Россия компанияларида иш тажрибасига эга. 12 йилдан ортиқ маркетинг бўйича директор бўлиб ишлаган, шулардан 5 йили – АҚШнинг Lucent ва Avaya компанияларида. Манн мунтазам равишда Россия бўйлаб корпоратив ва очиқ тренинглар ўтказиб келади. Унинг тренинг ва семинарларида 500 мингдан ортиқ киши иштирок этган.