Мексиканинг шимолидаги Чиуауа штатида бир оиланинг саккиз аъзоси номаълум қуролли жиноятчилар томонидан ўлдириб кетилди. Штат расмийларининг хабар қилишича, ҳалок бўлганларнинг икки нафари болалар бўлган.
Прокуратура берган маълумотларга қараганда, Мартинеслар оиласининг тўққиз аъзоси якшанба куни кечаси Каса Кемада туманида ўғирлаб кетилган. Бу ҳудуд “Олтин учбурчак” деб аталиб, унда Мексика мафияси наша плантацияларини ташкил қилган.
Ўғирланганлардан бир қочиб, ҳуқуқни муҳофаза қилувчи органларга мурожаат қилишга муваффақ бўлган. Шундан сўнг кенг миқёсли операция ўтказилиб, қидирув ишлари бошлаб юборилган, аммо олиб қочилганларнинг жасадларигина топилган. Сешанба куни бешта, чоршанба куни эса яна учта тана топилган. Уларнинг бошлари таналаридан жудо қилинган эди. Ҳалок бўлганларнинг икки нафари 15га тўлмаган ўсмирлардир.
Чиуауа штати жиноий гуруҳлар ўртасидаги кескин қарама-қаршилик нуқтаси ҳисобланади, негаки АҚШ чегарасида жойлашган ушбу ҳудуд гиёҳванд моддалари транзитида муҳим ўрин тутади. Штатнинг энг йирик шаҳри – Сьюдад-Хуарес 2006-2012 йилларда дунёнинг энг хавфли шаҳарларидан бири ҳисобланган. 2009 йилнинг ўзида у ерда 3 минг киши ўлдирилган эди.
Айни кунларда штатда вазият бироз яхшилангани айтилмоқда. Шунга қарамай, шу йилнинг июль ойи бошида АҚШ чегарасидаги Гваделупа муниципалитетида жиноий гуруҳ аъзолари маҳаллий полициянинг охирги вакили Хоакин Эрнандесни ўлдириб кетишди. 14 ёшли ўғли билан патрулдан қайтаётганида у тузоққа тушиб, ўққа тутилди, натижада ўзи ҳам, ўғли ҳам ўлдирилди.