Самарқанд давлат архитектура қурилиш институти қабул комиссиясининг масъул котиби, институтнинг маънавий ва маърифий ишлар бўйича проректори Ғайрат Яхшибоев абитуриентдан катта миқдорда пул олиш чоғида ҳуқуқни муҳофаза қилувчи органлар вакиллари томонидан қўлга олинди. Бу ҳақда самарқандлик журналист Тошпўлат Раҳматуллаев ёзмоқда.
Айтилишича, у қабул комиссияси аъзоси, институт касаба уюшмаси раиси Музаффар Маҳамматов билан шерикликда абитуриент қизга ўқишга киритиб қўйишни ваъда қилиб, катта миқдорда пул олган.
Раҳматуллаевнинг ёзишича, Башорат исмли абитуриент 2009 йилдан буён 7 марта имтиҳондан йиқилган, шу боис бундай ишга қўл урган. Ғайрат Яхшибоев ундан 4 минг доллар сўраган, пулларни эса Маҳамматов олиши керак бўлган. Аммо Башоратнинг бунча пул бўлмагани учун у ҳуқуқни муҳофаза қилувчи органларга мурожаат қилган.
“Мен синглим Мастура билан пулларни Маҳамматовнинг кабинетига олиб келдим. 4 минг доллар олиш пайтида у қўлга олинди”, – дейди қиз.
