Россияга қарши санкциялар кутилгандек натижалар бермаётгани сабабли Ғарб Россия энергия ресурсларининг Европа Иттифоқига экспортини чеклаб қўйиши керак, деган ғояни билдирмоқда Newsweek нашри.
Нашрнинг фикрича, “Россия нефти экспортига тақиқлов мамлакат иқтисодиётига жиддий зарба беради. Ғарб Россияга Қрим ва Украина сабабли киритган санкциялари кутилгандек натижа бермаяпти ва мос равишда уларни кучайтириш керак. Бунда нефть эмбаргоси кутилган натижани беради”, деб ёзмоқда Newsweek нашри.
Нашрдаги мақолада келтирилишича, Европа Иттифоқига Россия энергия ресурслари экспортини чеклаб қўйиш Россия бюджетига жиддий зарба бўлади, чунки бу бюджетнинг 40 фоизи нефть экспортидан олинадиган даромадлар ҳисобига шаклланади.
Newsweek’нинг таъкидлашича, Россия SWIFT банк тўловлари халқаро тизимидан ўчирилиб қўйиладиган бўлса. бу муаммони ҳал қилиш учун захира вариантларга эга. Бироқ нефть эмбаргоси мураккаб масала бўлиб, Россия уни енгиллик билан четлаб ўтолмайди, чунки бу билан боғлиқ логистик ва инфратузилмавий муаммоларни ҳал қилиш учун анча вақт талаб этилади.
Нашр шу билан бирга Россия нефтининг асосий истеъмолчиси ҳисобланган Европа Иттифоқини у нефтни бошқа давлатлардан танкерлар билан олиши мумкинлиги билан “юпатмоқда”.
Мақола муаллифининг фикрича, нефть эмбаргосидан жабрланадиган ЕИ корхоналарининг зиёнларини қоплаш мумкин. Асосий вазифа Россияга сабоқ бериб қўйишдан иборат, дейилмоқда мақолада.
Бироқ мақола муаллифи ўз мақоласида Эронга киритилган нефть эмбаргоси бу давлатнинг на сиёсий позициясини, на иқтисодиёт ҳолатини ўзгартира олмагани ҳақида лом-мим демаган.