Чет эллик сайёҳлар Қозоғистоннинг ёпиқ туристик объектларида бўлиши мумкин. Бу ҳақда мамлакат инвестициялар ва ривожланиш вазирлиги матбуот хизмати хабар бермоқда.
Ушбу объектлар рўйхатига Катта Олма-Ота кўли, Чорин миллий табиий боғлари, Жунғор Олатови, Кўлсой, Чимбулоқ тоғ курорти, Медео, Кўкжайлов, Устюрт табиат қўриқхонаси, Оқтов, Атиров, Уральск, Риддер, Сариоғоч, Тараз шаҳарлари кирди.
Ҳукумат қарори бош вазир Карим Масимов томонидан имзоланди ва эндиликда уни чоп этишга тайёргарлик кўрилмоқда.
2014 йил 16 апрелида имзоланган “Чегара чизиғи, карантин чизиғи ва чегара зонаси сарҳадларини белгилаш тўғрисида”ги ҳукумат қарорига биноан кўплаб объектлар ХХР билан чегарадаги 25 км ли зонага киритилиб, ҳужжат тартибининг қаттиқлаштирилиши боис хорижлик туристларнинг уларга бориши мураккаблашган ёки тақиқланган эди. Бунинг учун ички ишлар вазирлигидан махсус русхатнома олиш талаб этилар эди.
Шу боис инвестициялар ва ривожланиш вазирлиги маҳаллий ҳокимиятлар билан ҳамкорликда туристик объектлар рўйхатини тузиб чиқди. Ушбу рўйхатдан ўрин олган объектлар чекловлардан озод қилинади.