ХХР ташқи ишлар вазири Ван И Жанубий Хитой денгизидаги вазиятни кескинлаштиришга қарши чиқди. Xinhua агентлигининг маълум қилишича, у Куала-Лумпурда ўтаётган АСЕАН минтақавий форум чоғида ушбу баёнотни берган.
“Аввало, Жанубий Хитой денгизидаги умумий вазият барқарор. Йирик ихтилофлар келиб чиқиши эҳтимоли йўқ. Шу боис Хитой келишмовчиликларни кўпиртириб кўрсатадиган ва кескинлик юзага келтирадиган ҳар қандай сўзлар ва ҳаракатларга қарши”, – таъкидлади у.
Шу билан бирга, Ван Ининг фикрича, ХХР бошқа давлатлар билан бир қаторда денгизда навигация эркинлиги таъминланишидан манфаатдор.
“Денгиздаги қум тўкиш ишларига келсак, айрим давлатларнинг бу борадаги ташвишлари асоссиз, негаки бу ишлар анча олдин бошланган, ва уларни Хитой бошламаган. Бошқа сўзлар билан айтганда, охирги йилларда денгиздаги статус-кво ўзгаришларга учраб турган”, – қўшимча қилди вазир.
6 август куни АСЕАН (Жануби-шарқий Осиё давлатлари ассоциацияси) ташқи ишлар вазирлари ХХРнинг Жанубий Хитой денгизида сунъий ороллар яратиши юзасидан ўз ташвишини билдирди. Илгари бу хатти-ҳаракатларга АҚШ қарши чиққан эди.
