Ўзбекистонлик курашчи Элмурод Тошмуродов жаҳон рейтингидаги ўз ўрнини сақлаб қолди

Бирлашган кураш олами (UWW) июль натижаларига кўра юнон-рум кураши бўйича жаҳоннинг энг кучли спортчилари рейтингини янгилади. Ўзбекистоннинг етакчи курашчиси, жаҳон чемпионатларининг икки карра бронза медаль соҳиби, икки карра Осиё чемпиони Элмурод Тошмуродов ўзи иштирок этадиган 59 кг вазн тоифасида рейтингда 3-ўринини сақлаб қолди.

Ўзбекистон спорт кураши уюшмаси матбуот хизматининг маълум қилишича, бу вазн тоифасида рейтингда 1-ўринни россиялик курашчи Мингиян Семенов, 2-ўринни болгариялик Иво Ангелов эгалламоқда.