Лондоннинг "Тоттенҳэм" жамоаси "Вест Бромвич"дан Сайдо Берахинони трансфер қилиш бўйича музокараларда муваффақиятга эришишига ишонмоқда.
"Вест Бромвич" ушбу ёш ҳужумчиси учун 25 млн фунт сўрамоқда.
Қайд этиш жоизки, "шпорлар" бу ёзда трансфер бозорида ўтган мавсумлардаги каби фаоллик кўрсатишмаяпти. Лекин жамоа ўз сафига юқори тоифали ҳужумчи қўшиб олишни ният қилган.
Daily Mail нашрида ёзилишича, "Тоттенҳэм"дагилар Берахинонинг ўзи "Уайт Харт Лэйн"га келишга ошиқаётгани ҳақида гапиришмоқда.
Футболчининг иштиёқи эвазига бу трансфер амалга ошиши осон кечиши кутилмоқда.
Айни вақтда "Тоттенҳэм" футболчи учун сўралаётган маблағнинг ярмини, яъни 12,5 млн фунтни беришга розилигини билдирган.
Тахмин қилинишича, 22 ёшли футболчининг трансфери охир-оқибат 18 млн фунт эвазига амалга ошади.
Маълумот учун, бурундилик ушбу ҳужумчи ўтган мавсумда "Вест Бромвич" сафида 38 ўйинда иштирок этиб, 14та гол урган ҳамда битта голли узатма муаллифи бўлган.