“Даракчи” газетасида тўй маросимларидаги исрофгарчиликлар танқидига бағишланган навбатдаги материал эълон қилинди. Унда таъкидланишича, қизларнинг сепига аталган сандиқларни тўлдиришнинг ўзига бугунги кунда 5-50 млн ўртасидаги маблағ сарфланмоқда.
Материал муаллифи тўйларнинг бошқа харажатларини санаб ўтди. Булар орасида тоғора жўнатиш, қиз томоннинг 2-10 млн сўмлик мебель харид қилиши, наҳор оши маросимининг алоҳида ва тўлақонли тўйга айлантириб юборилиши шулар жумласидандир.
Лекин қиз томоннинг харажатлари тўй билан якун топмайди.
“Қиз узатганга қирқ йил тегма. Бу мақолни унутинг. Ҳали олдинда ҳафталик турибди”, – деб киноя қилади мақола муаллифи.
Таъкидланишича, чарларида куёвга қўйиладиган сарпонинг ўзи 2 млн сўмдан ортади. Чарлари маросимини ўтказишга кетадиган ўртача харажат эса 7-8 млн сўмни ташкил қилади. Бундан ташқари, ҳафталик маросимида ёш оилага бирор маиший техника буюми – чангюткич ё музлаткич тортиқ этилади. Бу совғанинг ҳам энг арзони 2 млн сўмдан кам бўлмаслиги керак.
“Европага тақлид қилиб келинларга елкаси очиқ кийим кийдиришни ўргандик, гул отиш маросимини ҳам худди ўзимизникидек қабул қилдик, лекин улар каби камхаражат 50-100 киши билан ортиқча исрофсиз тўй қилишни ҳеч ўргана олмадик-да”, – деб хулоса қилади журналист.