Бугун Европа Чемпионлар лигаси мусобақасининг гуруҳ босқичида 2-тур учрашувларига старт берилади.
Сешанба оқшомида 4та гуруҳда (E, F, G, H) 8та учрашув ўтказилади.
Зенит - Гент
Дастлаб, Санкт-Петербургнинг "Зенит" жамоаси ўз майдонида Бельгия вакили бўлган "Гент" клубини қабул қилади. Олдинги турда "Валенсия"ни сафарда мағлуб этган питерликларнинг бу ўйинда ҳам устун келиш учун имкониятлари юқори баҳоланмоқда.
Лион - Валенсия
Гуруҳнинг иккинчи учрашувида бир қатор етакчилари жароҳатлар туфайли сафдан чиққан "Лион" жамоаси Испаниянинг турнирдаги 5 иштирокчисидан бири "Валенсия"ни қабул қилади.
Порту - Челси
Жозе Моуриньо бошчилигидаги "Челси" футболчилари сафарда "Порту" меҳмони бўлишади. Қайд этиш керакки, лондонликлар мураббийи Моуриньо ўзининг илк ёрқин фаолиятини айнан "Порту"да ўтказган ва шундан кейин "Челси"га олиб келинганди.
Қайд этиш керакки, бу ўйин UzReport UZ телеканалида жонли равишда трансляция қилинади.
Маккаби - Динамо Киев
Биринчи турда "Челси" майдонида йирик ҳисобда (0:4) мағлуб бўлган исроилликлар бу турда Украина чемпиони "Динамо"ни қабул қилади.
Арсенал - Олимпиакос
Ўтган турда сафарда Хорватиянинг "Динамо Загреб" жамоасига қарши ўйинни кутилмаган мағлубият билан ўтказган "канонирлар" бугун Грециянинг "Олимпиакос" жамоасини қабул қилади. Бугунги ўйинни Жиру ўтган учрашувдаги қизил карточкаси туфайли ўтказиб юборади. Шунингдек, Арсен Венгар бу ўйинда Питер Чех ва Аарон Рэмси хизматларидан фойдалана олмаслиги мумкин.
Бавария - Динамо Загреб
F гуруҳининг иккинчи баҳси Германияда бўлиб ўтади. Бугун мюнхенликлар ўз майдонларида Загребнинг "Динамо" жамоасини қабул қилади.
Барселона - Байер
Е гуруҳида яна бир қизиқ учрашув ўтказилади. Бу ўйинда "Барселона" ўзининг асосий етакчиси Лионель Мессисиз ҳаракат қилишга мажбур.
Жамоа биринчи турни сафарда "Рома"га қарши ўтказган ва 1:1 ҳисобини қайд этганди. "Байер" эса биринчи учрашувда Беларуснинг БАТЭ жамоасини йирик ҳисобда таслим этган.
БАТЭ - Рома
Гуруҳ аутсайдери БАТЭ иккинчи турда Римнинг "Рома" жамоасига қаршилик кўрсатишга уриниб кўради.