Мол-мулки 62 млрд доллар деб баҳоланган Berkshire Hathaway компанияси раҳбари Уоррен Баффет Forbes рейтингига кўра АҚШнинг энг сахий кишиси деб топилди.
2014 йилда Баффет хайрия ишларига 2,8 млрд доллар сарфлади. Мазкур маблағларнинг катта қисми (2,1 млрд доллари) Berkshire Hathaway акциялари кўринишида Билл Гейтс ва унинг турмуш ўртоғи Мелинда томонидан асос солинган Bill and Melinda Gates Foundation инсонпарварлик ташкилотига тақдим этилди. Шу билан тадбиркор сарфлаган умумий хайр-саховат қиймати 22,7 млрд долларга тенглашди.
Билл ва Мелинда Гейтс бу йили рейтингнинг иккинчи поғонасини эгаллашди. Улар 2014 йилда ўзлари ташкил этган жамғарма орқали полиомиелит, безгак, сил, ОИВ ва ОИТСга қарши кураш мақсадларига 1,3 млрд доллар ажратишди.
АҚШдаги энг саховатпеша инсонлари учлигини 2014 йилда 733 млн доллар сарф этган Жорж Сорос эгаллади.
