Европадаги иқтисодий инқироз туфайли Буюк Британияда 50 мингта от изсиз ғойиб бўлган. The Telegraph нашрида ёзилишича, бу отлар овқат тайёрлаш учун сўйиб юборилгани тахмин қилинмоқда.
Профессор Крис Эллиотнинг айтишича, жониворларнинг кўп миқдорда йўқолиши 2008 йилдан бошлаб кузатилган. Унинг қайд этишича, европаликлар ўз отларини бу жониворларни боқиш машаққатларидан қутилиш учун сота бошлашган ва бу отлар жиноятчилар ҳамда қассоблар қўлига келиб тушган.
Таҳлилчиларнинг огоҳлантиришича, бу жониворларнинг гўштлари арзон таомлар тайёрланадиган таомхоналарда бургерлар тайёрлаш учун ишлатилган.
"Тасаввур қилиб кўринг, 50 мингта от ўз-ўзидан йўқолиб қолган. Бунда йирик жиноий гуруҳларнинг қўли борлиги аниқ", дейди Эллиот.
Унинг қайд этишича, бу ноқонуний йўл орқали жиноятчи ва фирибгарлар миллиардлаб даромад қилишган.
"Бу муаммонинг ягона чораси барча биргаликда ҳаракат қилиши, фермерлар, давлат ва озиқ-овқат саноати вакиллари ҳамкорликда иш олиб бориши керак", дейди профессор.
"Гўшт бизнеси - соф иш эмас. Жиноятчилар қинғир йўллар билан гўшт маҳсулотларини арзон нархларда сотиши муаммони чигаллаштиради. Харидорлар арзон нархларга алданишлари мумкин", дея қайд этади Лондондаги қишлоқ хўжалиги университети сиёсий таҳлилчиси Тим Ленг.
Маълумот учун, 2013 йилда Ирландиядаги гамбургер тайёрланадиган фабрикалардан бирида мол гўшти ўрнига от гўшти ишлатилгани аниқланганди.