Эрон авиакомпаниялари 13 та Boeing 737 самолёти сотиб олди. Бу ҳақда 1 ноябрда Press TV телеканали маълум қилди.
“Эрон авиакомпаниялари ўзининг фуқаролик авиацияси флотини тўлдириш мақсадида 13 та тор фюзеляжли Boeing 737 самолёти сотиб олди. Сотиб олинган 2 та самолёт Эронга 2 ноябрда олиб келинади. Boeing 737-S модификациясидаги 8 та самолётдан 2 таси яқинда ташкил этилган Nasim Air авиакомпанияси томонидан сотиб олинди”, дейилмоқда хабарда.
Эроннинг Caspian Airline авиакомпанияси учта ва Aseman Airlines авиакомпанияси маҳаллий авиалиниялар учун яна иккита 150 ўринли самолёт сотиб олди.
Бундан ташқари, Эронда энг йирик авиакомпаниялардан бири бўлган Mahan Air Британияда ишлаб чиқарилган Avro RJ самолёти сотиб олди. Бу самолёт 30 октябрда олиб келинди.
The Fars News Agency агентлигининг таъкидлашича, барча сотиб олинган лайнерлар 15 йилдан каттароқ ёшга эга, бироқ харидорлар моделларни танлашда ишлаб чиқарувчи компания эҳтиёт қисмларни етказиб бера олиши-олмаслигидан келиб чиққан.
Эрон агентлигининг маълум қилишича, самолётларни сотиб олган Эрон авиакомпанияларидан бирортаси АҚШнинг Эронга киритган санкцияларига кўра битимлар тузиш тақиқланган компаниялар рўйхатига кирмайди. Жумладан, санкциялар киритилиши сабабли авиакомпаниялар эҳтиёт қисмлар ва янги самолётлар сотиб ололмагани учун Эрон самолётлари иштирокида кўплаб нохуш воқеалар ва жумладан одамлар ўлимига олиб келган фалокатлар содир бўлган.