UzReport TV телеканали Discovery Channel телеканали билан узоқ муддатли ҳамкорлик тўғрисида келишув имзолаганини маълум қилди.
Ушбу ҳамкорлик бир қатор дастурларни қамраб олган. Унга кўра, "Бу қандай ясалган?" (How It’s Made?), "Бу қандай ясалган: Орзудаги автомобиллар" (How It’s Made: Dream Cars), "Ер қандай ишлайди?" (How the Earth Works) ва "Ҳаёт тезлиги" (Speed of Life) каби дастурлар UzReport TV телеканалининг эксклюзив таржимасида намойиш этилади.
Бу келишув телеканал контентини янада бойитиш ҳамда уни миллионлаб телетомошабинлар учун янада қизиқарли қилишга йўл беради. Телеканал кўп сонли телетомошабинлар фикрларини ўрганган ва уларнинг истакларини инобатга олган ҳолда ушбу танловни амалга оширган.
Қайд этилишича, телеканалда дастлаб "Бу қандай ясалган?" кўрсатуви намойиш этилиши бошланади.
Маълумот учун, "How It's Made?" кўрсатуви Discovery Channel телеканали томошабинлари учун қимматли билимлар тақдим этадиган кўрсатув бўлиб, унда томошабинларга кундалик эҳтиёж учун ишлатиладиган оддий буюмларнинг қандай шароитларда ясалиши жараёни кўрсатиб берилади. Хусусан, бу кўрсатув орқали томошабинлар учун тиш чўткасидан тортиб гольф коптокларигача бўлган турли буюмларнинг яратилиши жараёни ҳақида маълумот берилади.
Кўрсатув ҳафтанинг сешанба ва пайшанба кунларида, соат 20:30да рус ва ўзбек тилларида эфирга чиқиши айтилган. Бугун, соат 20:30да бу кўрсатувнинг илк сонини томоша қилиш мумкин.
Қўшимча қилинишича, ушбу ҳамкорлик нафақат фильмлар намойиши, балки бошқа қўшма лойиҳаларни ҳам кўзда тутади.