Volkswagen автоконцерни ички тергов натижасида 800 мингта автомобилда зарарли чиқиндилар даражасини аниқлашда кўрсаткичлар мос келмаслиги аниқланганини маълум қилди, деб хабар берди Reuters ахборот агентлиги.
Компанияда таъкидланишича, дастлабки баҳолашларга кўра, аниқланган қоидабузарликлардан концерннинг кўрадиган молиявий зарарлари 2 млрд еврони ташкил қилиши мумкин.
“Volkswagen топ-менежменти мутасадди муассасалар билан аниқланган қоидабузарликлар оқибатлари борасида зудлик билан музокараларга киришади”, деб айтилди компанияда.
АҚШ ҳукумати Volkswagen дизель двигателли 10 мингга яқин автомобилда иккинчи бор зарарли чиқиндилар синовларини қалбакилаштирганини айтди.
Немис автоконцерни АҚШ мутасадди ташкилотларининг янги моделлардаги автомобилларда, хусусан Porsche люкс брендида чиқиндилар кўрсаткичининг пасайтириб кўрсатилиши ҳақидаги янги айбловларини қатъиян рад этганди.