5 ноябрда Тожикистон президенти Эмомали Раҳмон Тожикистон Конституцияси қабул қилинганининг 21 йиллиги муносабати билан юртдошларига телемурожаат билан юзланди.
21 йил аввал Тожикистонда умумхалқ референдумида мустақил Тожикистоннинг биринчи Конституция қабул қилинган эди.
Эмомали Раҳмоннинг таъкидлашича, бу муҳим тарихий ҳужжатнинг буюклиги ва аҳамиятлилиги шундаки, у биринчи марта фуқароларнинг ўз фикрларини эркин билдиришлари орқали халқ томонидан ва халқ учун қабул қилинди.
Тожикистон Конституцияси давлат учун жуда беқарор даврда қабул қилинишига қарамасдан, ҳеч қандай қийинчилик ва муаммолар, жумладан Тожикистон давлати ва халқига суқиштирилган даҳшатли фуқаролик уруши ҳам тинчликсевар ва бунёдкор тожик халқини ҳақ йўлдан, замонавий миллий давлат барпо этиш йўлидан оғиштира олмади, деб таъкидлаб ўтди Раҳмон.
Шунинг учун ҳам Конституция ҳар бир тожик фуқаросининг ҳақиқатан ҳам фахрланишига муносиб, мустақиллик йилларида эришилган муҳим воқелик бўлди.
Тожикистон президентининг таъкидлашича, конституцион меъёрлар асосида инсон ҳуқуқ ва эркинликлари кафолати ҳамда уларнинг ҳимоя қилиниши давлат сиёсатининг асосий устуни ҳисобланади.
“Тожикистонда мустақиллик йилларида кўплаб қийинчилик ва тўсиқларга қарамасдан, конституцион меъёрларга ҳурмат ва уларни амалга ошириш туфайли биз эркин ва демократик муҳит ҳукм сураётган жамиятни қура олдик, сиёсий барқарорлик, миллий бирдамлик, давлат ва миллатнинг бугуни ва келажагининг мустаҳкамлиги ва узоқ умр кўриши таъминланган.
Шунинг учун шавкатли ва мағрур тожик халқини Конституция куни муносабати билан табриклайман ва ҳар бир оилага тинчлик, тотувлик, бахт ва фаровонлик тилайман.
Конституциямиз бизнинг йўлимизни ҳамиша чорағон этсин ва энг янги Тожикистон жамиятини бирлаштирсин!”, деб тожик аҳлини чин дилдан муборакбод этди Тожикистон президенти.