Саудия Арабистони Қироллиги 2015 йилги ҳаж мавсумида Бирлашган Миллатлар Ташкилотига Каъбапўшнинг бир бўлагини совға қилди, деб ёзади Muslim.uz портали. Муқаддас кисва(каъбапўш)ни Қиролликнинг БМТдаги доимий вакили Абдуллоҳ Ал-Муаллимий топширди.
Халқаро ташкилот бош котиби Пан Ги Мун туҳфани қабул қилиб олар экан: “Маккаи мукаррамадан Нью-Йоркдаги қароргоҳимизга юборилган бебаҳо совға учун миннатдорлик изҳор этишга изн бергайсиз. Ислом маданиятининг бир парчасини сақлаш ташкилотимиз учун фахрдир.”, - деб, миннатдорчилик билдирди.
Эслатиб ўтамиз, каъбапўш бўлаги БМТга илкбор 1980 йилда ҳадя қилинган.
Маълумот учун айтиб ўтмоқчимиз, Каъбапўш – эллик бўлакдан иборат ипак мато бўлиб, ундаги битиклар тилла суви юргизилган ип билан тикилади. У ҳар йил Зулҳижжа ойининг 9-куни, ҳожилар Мино водийсидан Арафот тоғига йўл олган пайтда алмаштирилади. Алмаштирилган Каъбапўш бир неча бўлакларга бўлиниб, бошқа давлатлардаги мартабали шахслар ва турли халқаро ташкилотларга туҳфа сифатида тарқатилади.
