"Арсенал" жамоаси бош мураббийи Арсен Венгер ўз шогирдларидан бири, франциялик ҳимоячи Лоран Косьельнининг "Вест Бромвич"га қарши ўйинда майдонга туширмаслиги мумкинлигини билдирди. Бунга футболчи Париждаги фожиали воқеалардан кейин ўзини жуда ёмон ҳис қилаётгани сабаб бўлади.
"Лоран Германияга қарши ўйинда жуда зўр ўйнади. Аммо мен уни Англияга қарши ўйинда умуман таний олмадим. Париж воқеалари унинг руҳиятида қаттиқ из қолдирган ва у ҳали ўзига кела олмаяпти.
Мен Лоран билан гаплашдим. Ҳозирча у руҳий жиҳатдан тикланганига ишончим комил эмас.
"Вест Бромвич"га қарши ўйиннинг аҳамияти катта ва мен уни бу майдонга тушириб таваккал қилмоқчи эмасман. Бугунги кунда АПЛ ўйинларига қандайдир 70 ёки 80 фоиз тайёргарлик билан кириб бўлмайди. Ўйинга 100 фоиз тайёр бўлиш лозим.
Мен Косьельнини у ҳаммасини унутгани ва фақат ўйин ҳақида ўйлаётганига амин бўлсамгина, майдонга тушираман. Акс ҳолда, йўқ", дейди канонирлар бош мураббийи.
Бироз олдинроқ, Англия чемпионатининг 13-турида Париж теракти қурбонлари хотирасига ҳурмат тарзида барча ўйинлар бошланишидан олдин стадионларда Франция мадҳияси "Марсельеза" куйланиши ҳақида хабар қилинганди.
Маълумот учун, айни вақтда "Арсенал" 12 турдан кейин 26 очко тўплаган ҳолда "Манчестер Сити" билан биринчи ва иккинчи ўринларни бўлишиб турибди. Жамоанинг "Вест Бромвич"га қарши ўйини 21 ноябрь куни сафарда ўтказилади. Шу куни "Манчестер Сити" "Ливерпуль"ни қабул қилади.