Россиянинг Су-24 самолёти учувчилари тирик ва уларни Туркияга олиб келиш чоралари кўрилмоқда. Бу ҳақда Hurriyet Daily News нашри хабар тарқатган.
Хабарда айтилишича, айни вақтда улар Суриядаги мухолиф жангарилари қўлида асирликда бўлиб турибди ҳамда Туркия уларни озод қилиш чораларини кўрмоқда. Бу ҳақда ўз исмини ошкор қилишни истамаган туркиялик амалдор маълумот берган.
"Бизнинг махсус бўлинмаларимиз Сурия билан чегара ҳудудида уриб туширилган Су-24 самолёти учувчиларнинг тириклиги ҳақида маълумот олишган. Улар катапульта орқали ерга соғ-омон қўнишган ва асирга тушишган", деган манба.
Бугун, 24 ноябрь кунининг биринчи ярмида Туркия Россиянинг Су-24 русумли бомбардимончи ҳарбий самолёти ўз ҳаво чегараларини бузиб ўтганликда айблаб уриб туширганди.
Бу ҳодиса расмий Москва томонидан кескин норозилик билан кутиб олинди. Россия президенти Туркияни террорчиларга қарши курашаётган Россия самолётини уриб тушириш орқали террорчиларга ёрдам кўрсатишда айблади ва бу ишнинг оқибатларидан огоҳлантирди.
У бу ишни ортдан берилган зарба сифатида баҳолаган.
Россия Мудофаа вазирлиги эса Су-24 самолёти Туркия ҳаво ҳудудини бузиб ўтмаганини билдирган.
Бундан аввалроқ, айрим ОАВларда самолётнинг ҳар икки учувчиси ҳалок бўлгани ҳақида хабар берилган, лекин бу маълумотлар расман тасдиқланмаганди.
Сурия мухолифати учувчилардан бириннинг жасади ўз тасарруфида эканини айтиб, уни Сурия ҳукумати асирлигида бўлган бир вакилига алмаштириш ниятида эканини айтганди.
Шунингдек, Суриядаги туркманлар гуруҳи вакили учувчиларнинг ерга тушгач, отиб ташлангани ҳақида маълумот берган.