Россия президенти Владимир Путин Туркияга нисбатан махсус иқтисодий чоралар қўллаш бўйича фармонни имзолади. Бу ҳақда Кремль матбуот хизмати маълум қилди.
Путин ўз фармони билан Россияга Туркиядан муаяйн турдаги маҳсулотларни олиб киришга тақиқлов ёки чеклов киритди. Маҳсулотлар рўйхати Россия ҳукумати томонидан белгиланади.
Путин Россия ҳукуматига тақиқлов киритиладиган тегишли маҳсулот, ишлар (хизматлар) рўйхатини тузиб чиқиш вазифасини юклади.
“Россиянинг миллий хавфсизлиги ва миллий манфаатларини, Россия фуқароларини жиноий ва бошқа қонунга зид ҳаракатлардан ҳимоя қилиш мақсадида” фармонда Туркия ҳимоясида бўлган ташкилотлар томонидан Россияда муайян турдаги ишларнинг бажарилишига тақиқлов киритилиши ҳам кўзда тутилган.
Шунингдек, россиялик иш берувчиларга 2016 йил 1 январдан Туркия фуқароларини ишга жалб қилиш тақиқланади.
Шунингдек, Путин 2016 йил 1 январдан Туркия билан визасиз тартибнинг амал қилишини тўхтатиш ҳақидаги фармонни имзолади.
Туроператорларга Туркияга ташриф буюришни кўзда тутувчи сайёҳлик маҳсулотларини сотмаслик тавсия қилинди. Шунингдек, Путин ҳукуматга Россия ва Туркия ўртасида чартер ҳаво ташишларига тақиқлов киритишни кўзда тутувчи чораларни ишлаб чиқишни буюрди.