Россия президенти Владимир Путин Париждаги Иқлим ўзгариши конференциясининг суратга тушиш маросими ва мотам тадбирларида нега иштирок этмаганини тушунтирди. Унинг айтишича, бу “техник сабаблар”га боғлиқдир.
Ле-Буржда ўтган матбуот анжуманида унга журналистлардан бири шу саволни берди.
“Менинг суратга тушиш маросими ва мотам тадбирларида иштирок этмаганим техник характердаги масаладир”, - деди у.
Путин бу “график масаласи” ҳамда “ҳамкасблар билан конференциядаги чиқишлар ва икки томонларни муҳокама қилиш” билан боғлиқлигини таъкидлаб ўтди.
Шунингдек, Путин Париждаги терактлардан сўнг Россия биринчилар қаторида Францияга ҳамдардлик билдирганини эслатиб ўтди.
“Россия терактларга кўп бора дуч келган ва улкан йўқотишлар кўрган”, - деди у, А321 ҳалокатини ёдга оларкан.
Парижда Путиннинг туркиялик ҳамкасби Ражаб Тойиб Эрдўған билан учрашуви белгиланмаган бўлса ҳам, улар суратга тушиш маросимида юзма-юз бўлиши мумкин эди. Айрим журналистлар Путин шу туфайли кеч қолганини тахмин қилмоқда.
Парижда Путин АҚШ президенти Барак Обама, Германия канцлери Ангела Меркель, ХХР раиси Си Цзиньпин ва Еврокомиссия раиси Жан-Клод Юнкерлар билан учрашди.