Россия Ташқи ишлар вазири Сергей Лавров Туркия ТИВ раҳбари Мавлют Човушўғли билан учрашишга рози бўлган. Бу ҳақда meduza.io хабар берди.
Лавровнинг ўзи томонидан билдирилишича, Туркия томони 3-4 декабрь кунлари Белград шаҳрида ўтказиладиган ЕХҲТ давлатларининг Ташқи ишлар вазирлари кенгаши вақтида ўзаро учрашув ташкил қилиш таклифини билдирган.
"Биз бундай алоқага киришишдан қочмаймиз. Жаноб Човушўғлининг бизга нима демоқчилигини эшитмоқчимиз. У бирон янги гап айтармикан?", деган Лавров.
Россия Туркиядан Су-24 самолётини уриб туширгани учун узр сўрашни талаб қилишда давом этмоқда. Туркия самолётни ўз ҳаво кенгликларини бузиб ўтгани учун уриб туширганини таъкидламоқда. Россия Мудофаа вазирлиги эса воқеа юз берган 24 ноябрь кунида Су-24 самолёти фақат Сурия осмонида ҳаракатланганини билдирган.
Туркия томони узр сўрамаслигини билдирган. Туркия президенти Ражаб Тойиб Эрдўған узр сўраши керак бўлган томон аслида Россия эканини айтган. Лекин у Россияга Су-24 самолёти ҳалокати муносабати билан ҳамдардлик изҳор этган.
Эрдўған бу ҳодиса юз берганидан кейин телефон орқали Россия президенти билан гаплашиш учун бир неча марта уринди, лекин гўшак кўтарилмади. Шунингдек, у Париждаги Иқлимий саммит доирасида Путин билан учрашиш истагини билдирди, лекин бундай учрашув ўтказилмади.