Украинанинг Одесса вилояти губернатори Михаил Саакашвили Украина коррупция туфайли ҳар йили 5 млрд доллардан кўпроқ пул йўқотаётганини айтди.
Саакашвили бу ҳақда Одессада бўлиб ўтган антикоррупцион форум доирасида айтиб ўтди.
“Жорий ҳукумат даврида давлат корхоналаридан расман 120 млрд гривна ўғирланган. Бизнинг ҳисоб-китобларга кўра, бу схемалар бўйича иқтисодиётдан 5 млрд доллар оқиб кетган, ялпи ички маҳсулот 20 фоизга тушиб кетган. Бундан ташқари, ҳукумат ҳеч қандай яхшиланишни ваъда бермаяпти. Мен келтирган рақамларимга жавоб бераман. Ким бунинг барчасига жавоб беради? Билмадим. Нормал давлатларда буларга ҳукумат жавоб беради”, деб айтди Саакашвили.
Аввалроқ Саакашвили украиналик тадбиркорлар Ринат Ахметов ва Игорь Коломойскийни мамлакатдаги энг йирик коррупционерлар деб атаганди. Саакашвили, шунингдек, “Народний фронт” депутатлари Николай Мартыненко ва Андрей Иванчук ҳамда олигарх Дмитрий Фирташни ҳам коррупционерлар қаторига қўшган. Саакашвилининг айтишича, уларга Украина бош вазири Арсений Яценюк кўмак кўрсатади.