Google компанияси йилга якун ясаб, 2015 йилда интернетда энг кўп қидирилган дизайнерлар номини маълум қилди. Бу рўйхатда 1-ўринни Раф Симонс эгаллади, у октябрь охирида Dior модалар уйи креатив директори лавозимини тарк этди. Оммабоп модельерлар рўйхати Vogue британ журнали сайтида чоп этилди.
Энг оммабоп модельерлар ўнталигига Карл Лагерфельд, Кристиан Лакруа ва Томми Хилфигер кирди. Бундан ташқари, нашр мода ҳақида энг кўп сўралган саволлар рўйхатини келтирди. Аниқланишича, фойдаланувчиларни кўпроқ пошнали туфлиларда қандай тўғри юриш, жинсиларда қандай қилиб тешик ҳосил қилиш ва агар тўй ўрмонда ўтса, нима кийиш кераклиги ҳақидаги маълумотлар қизиқтирган.
Энг муҳокама қилинган мавзулар қаторида, шунингдек, интернетни иккига бўлган кўйлак ҳам бўлди: фойдаланувчиларнинг бир қисми бу кўйлакни оқ-олтин рангда, бошқа қисми эса кўк-қора рангда дейишган. Бир неча кунлик баҳс-мунозарадан кейин кўк-қора кўйлак бўйича қидирув кўпроқни ташкил қилди.
Глобал борада, энг муҳокама қилинган мавзулар Париждаги терактлар, миграция масаласи, Непалдаги зилзила ва АҚШда бир жинс вакилларини никоҳ қуришига тақиқловнинг бекор қилиниши бўлди. Энг кўп муҳокама қилинган одам ўз жинсини ўзгартирганини эълон қилган, Ким Кардашьяннинг ўгай отаси Брюс Женнер бўлди. У ўз исмини Кейтлин Женнер деб, аёллар исмига ўзгартирган.