Хитойнинг жанубида жойлашган Шэньчжэнь шаҳрида йирик кўчки юз берган ҳудудда қидирув-қутқарув операцияси давомида бедарак йўқолган 81 киши қидирилмоқда. “Синьхуа” ахборот агентлигининг маълум қилишича, қутқарувчилар 22 декабрда вайроналар остидан бир нафар жасадни чиқариб олишган.
Қутқарув операцияси доирасида маҳаллий ҳукумат 600 кишига бошпана тақдим қилди, яна 900 киши хавфсизлик нуқтаи назаридан эвакуация қилинган.
Кўчки 20 декабрда маҳаллий вақт билан 11:40 да Liuxi саноат паркида юз берган. Маълум қилинишича, кўчган тупроқ 380 минг квадрат метрлик ҳудудни қоплаб олган, лой қатлами қалинлиги баъзи жойларда 10 метргача етмоқда. Кўчки 33 та бинонинг вайрон бўлиши ёки қаттиқ зарарланишига олиб келди.
Қутқарув операциясида 2,9 мингдан кўпроқ киши иштирок этмоқда, 78 та экскаватор ва бошқа техника қўлланмоқда. Геологларнинг айтишича, кўчки қайтарилиши хавфи эҳтимоли кам.