Ўз ичига Хитой, Япония, Шимолий ва Жанубий Кореяларни олувчи минтақада кутилмаганда уруш бошланиб кетиши мумкин, шу боис АҚШ бу давлатларда тинчлик ва барқарорликни сақлаб қолиш йўлида ҳаракат қилиши лозим, деб ҳисоблайди National Interest колумнисти.
Мақола муаллифининг фикрига кўра, ихтилоф келтириб чиқарадиган бир қанча омиллар бор. Биринчи навбатда Хитой ва Япония манфаатларининг тўқнаш келиши кутилмоқда; ушбу давлатлар яқин орада иттифоқчи бўлиши бирор бир эксперт томонидан башорат қилинмаяпти. Айни пайтда Япония АҚШ билан биргаликда минтақавий хавфсизликни таъминламоқда, бу эса Шарқий Осиёда етакчиликка даъво қилаётган ХХРга ёқмайди.
Жанубий Хитой денгизи ҳам мана шундай қайноқ нуқталардан бири бўлиб турибди. Сув ҳудудлари атрофидаги баҳслар ҳам тўқнашувларга олиб келиши мумкин. Рақобат аллақачон бошланиб кетган, айрим давлатлар кучларини намойиш қилиш йўли билан баҳсда ютиб чиқишга интилмоқда.
Ниҳоят, учинчи хавфли омил КХДРдир. Ким Чен Иннинг хатти-ҳаракатлари бутун дунёнинг норозилигига сабаб бўлаётганига қарамай, мақола муаллифининг фикрича, айнан унинг қулаши мамлакатда ва бутун минтақада узоқ йиллик ҳарбий тўқнашув ва ихтилофларга олиб келиши мумкин. Бу биринчи ўринда Жанубий Кореяга таъсир ўтказади. Шу боис Сеул Пхеньяндаги режимни сақлаб қолишга интилмоқда.