ОАВ бозорларда сотилаётган нонларнинг тоза сақланмаслигига эътироз билдирди

“Оила даврасида” газетасининг навбатдаги сонида бозорларда сотилаётган нон маҳсулотлари гигиена қоидаларига мос бўлмаган шароитларда сақланиши танқид остига олинди.

“Бозорлардаги нонфурушларнинг саватлари, қутилари ва болалар аравачаларидаги нонлар устига кир-чир мато, (уларни дастурхон дейишга тил бормайди) увадаси чиққан кўрпача ёки эски адёл ёпилган бўлади”, - деб таъкидлайди мақола муаллифи.

Шунингдек, у “нон михлаб қўйиш” одатини ҳам эслаб ўтди: “Нонфурушларнинг ғашни келтирадиган яна бир қилиғи бор. Улар уйлари олдидаги чанг-тўзон кўтарилиб турадиган катта кўча бўйидаги стул ёки курсига нонни михлаб ёки шундоқ ташлаб қўяверишади. Бу уларнинг “жонли реклама”си бўлса керак”.