Виталий Кличко укасига фаолиятини якунлашни маслаҳат қилган

Супероғир вазнда собиқ жаҳон чемпиони, айни вақтда Киев шаҳри мэри ҳисобланадиган Виталий Кличко ўз укаси Владимир Кличкога унинг британиялик боксчи Тайсон Фьюри билан жангдаги мағлубиятидан кейин боксни тарк этиш фурсати келгани ҳақида айтган. Бу ҳақда Champion нашрида ёзилган.

Виталий Кличко Тайсон Фьюрини ўз укасига тенг кучли спортчи эмаслигини, унинг жангда ғалаба қилганидан ҳайрон бўлганини таъкидлаб ўтган.

"Лекин шундай кунлар бўладики, "юлдузлар чарақламайди", тезлик ва зарбалар йўқ бўлиб қолади", деган катта Кличко.

У укаси билан Фьюридан енгилганидан кейин очиқчасига гаплашганини айтган.

"Мен унга олдинда икки йўл турганини айтдим. "Сен шуни билишинг керакки, ўзингнинг нималарга қодирлигингни исботлаб бўлгансан. Ҳозир сенда икки вариант бор. Биринчиси, барчага ўзинг энг зўр боксчи бўлганинг, сенинг натижаларингни ҳеч ким такрорлай олмаганини эслатиб, мухлисларга ўзингни қўллаб туришгани учун миннатдорчилик билдирган ҳолда хайрлашиш. Иккинчиси, шундай кетмоқчи эмаслигинг, рингга қайтиб барчага ўзингнинг нималарга қодирлигингни яна бир бор намойиш этиш, Фьюри билан аввалги жангдаги мағлубият тасодифий бўлганини исботлаш", дейди у.

Бундан олдинроқ, Профессионал бокснинг супероғир вазн тоифасида учта йўналиш чемпиони, WBA, WBO ва IBO камарлари соҳиби британиялик боксчи Тайсон Фьюри собиқ жаҳон чемпиони украиналик боксчи Виталий Кличко билан реванш ўтказиш борасида келишувга эришганин ҳақида хабар қилинганди.

Эслатиб ўтамиз, 28 ноябрь куни Дюссельдорфда ўтказилган жангда Тайсон Фьюри Владимир Кличкони очколар ҳисобига кўра мағлубиятга учратиб, рақибига тегишли бўлган чемпионлик камарларини (IBF, IBO, WBO ва WBA) тортиб олганди.