Ўзбек шоу-бизнесининг қаллобликда айбланаётган вакиллари

Sayyod.com сайти ижодкорлари ўтган йиллар давомида молиявий жиноятлар ва қаллобликларга алоқадорлик ортидан “ном қозонган” айрим шоу-бизнес вакилларини ёдга олиб, улар билан боғлиқ ҳолат бугунги кунда қандай эканлигини эсга олишди.

Эслатиб ўтамиз, илгари Муниса Ризаеванинг маъмури ҳамда хонанда Жасур Ғойиповнинг молиявий жиноятлари ҳақида шовшув кўтарилган эди. Ҳар икки гумондор ҳам чет элга кетиб қолган, лекин бироз муддатдан сўнг қайтиб, жавобгарликка тортилган эди.

“Собиқ маъмурим Тошкентга қайтиб келди ва терговда кўришдик, - Муниса Ризаеванинг сўзларини келтиради сайт. – Айни дамда кичик хонадонни менинг номимга расмийлаштириш жараёнида. Менга қайтариши керак бўлган сумма олдида, албатта, бу арзимас нархдаги хонадон. Камига у уйда у ўз оила аъзолари билан яшамоқда, шу сабаб менга расмийлаштирди нимаю, расмийлаштирмади нима? Билмасам, пулларни қайтарармикан... Менимча, қайтармаса хам керак, лекин уни қаматишдан манфаатдор эмасман. Қаматиб пулни олмадим нима, қаматмай олмадим нима?”.

Хонанда Жасур Ғоипов эса айни дамда хибсда ва тергов остида, деб хабар қилинмоқда. Унинг асл фамилияси хам Ғойипов, эмас Тўраев экан. Маълум бўлишича, узоқ вақт хорижда бўлган Жасур у ерда карьера қилаётгани хақида айтиб, жиноят иши борасидаги барча гап-сўзларни инкор қилган, аммо 2015 йил сўнггида қиз фарзандли бўлгани боис Тошкентга қайтганида ушланиб, вақтинчалик сақлаш учун тергов хибсхонасига топширилган. У билан боғлиқ тергов қилинаётган иш хам молиявий муаммоларга тақалган.

Материалда бошқа ўхшаш ҳодисаларга ҳам тўхталиб ўтилди. Шоҳруҳхон ва Нилуфар Усмонованинг собиқ маъмури, Тоҳир исмли йигит билан боғлиқ равишда пуллар, қарзлар ва артистларни тўйларига берилган аванслар билан боғлиқ муаммолари хақида шоу-бизнес оламига хабар тарқалиб, бироз ўтмай маъмур у муаммоларнинг бари барҳам топганлиги ҳақида маълумот берган эди. 2015 йилдан у Тамила, Амира Алибекова ва Ягоналарга маъмурликни бошлаган. Янги йилда эса яна йўқолиб қолган. У ўзи ишлайдиган бир хонандадан қарз олиш билан бирга, Шоҳруҳхон ва яна бошқа артистларнинг авансини олиб кетган.

“Режиссёр ва клипмейкер Жасур Шаметов, актриса Шаҳзода Муҳаммедова, актёр Акбархўжа Расулов ва “Менинг юртим” телеканали маъмурияти билан боғлиқ можаролар портлаш арафасида, - деб ёзади Sayyod.com. – Муаммо жиддий дейишмоқда. Ҳозирча музокаралар кетмоқда”.