Самвел Бабаян: Биз турнирдаги энг қийин гуруҳдан жой олганмиз

Қатар пойтахти Доҳа шаҳрида старт олган U-23 ёшлар ўртасидаги Осиё чемпионати "C" гуруҳи вакиллари иштирокида матбуот анжумани бўлиб ўтди.

Ўзбекистон олимпия терма жамоаси бош мураббийи Самвел Бабаян Жанубий Кореяга қарши илк ўйиндан олдин турнирдаги барча жамоалар, жумладан Ўзбекистон U-23 терма жамоаси ҳам олий мақсад – Олимпиада йўлланмаси учун кураш олиб бориш учун Қатарга келганини таъкидлади.

“Қатардаги турнир ҳозирги кунда шу ёшдаги энг кучли терма жамоаларни тўплади. Улар Осиё футболи келажаги деб айта оламан. "С" гуруҳи эса турнирдаги энг кучли гуруҳ. Бу ерга барчамиз нима учун келганимизни биламиз. Биз ҳам, ўз навбатида ўзимизнинг энг яхши ўйинимизни кўрсатиш ва Олимпиада йўлланмасини қўлга киритиш учун ташриф буюрдик”, - дейди Бабаян.

“Тўғри, биз Осиё чемпионати финал босқичига йўлланмани қийинчилик билан қўлга киритдик. Аммо, айтишим керак, таркиб деярли 50 фоизга янгиланди. Бу бизга келажакка оптимистик кўз билан қарашга сабаб бўлади. Таркибимиздаги аксарият футболчилар ёш бўлишига қарамай анча истеъдодли футболчилар деб айта оламан. Уларнинг кўпчилиги 20 ёшгача бўлган Жаҳон чемпионатида иштирок этишди. Таркибимизни ёшартирганимизга қарамасдан, биз тўғри йўлдан кетаяпмиз деб ҳисоблайман. Яна қайтараман, биз яхши тайёргарлик кўрдик ва ўз ўйинимизни намойиш эта олсак, мақсадимизга эриша оламиз.

Ўзбекистонда истеъдодли ва тажрибали мураббийлар кўп. Ўзбекистон Футбол Федерацияси президенти мени олимпия терма жамоасига ҳам бош мураббий этиб тайинлаганининг сабаби, аввало миллий терма жамоа учун қай даражада захирага эга эканлигимизни аниқлаб олиш учун. Сабаби, бу футболчилар, нафақат миллий терма жамоа, балки ўзбек футболининг ҳам келажагидир. Қолаверса, миллий терма жамоанинг ўйин фалсафаси, ғоясини олимпия терма жамоасига ҳам сингдириш лозим деб ўйлайман”, - деди Ўзбекистон олимпия терма жамоаси бош мураббийи.

Самвел Бабаян шунингдек, ҳар бир рақибнинг ўйинини терма жамоа мураббийлар штаби етарлича ўрганганини алоҳида таъкидлади.

“Барча рақибларимизнинг ўйин услубларини етарлича ўргандик. Ҳатто, айтишим мумкин уларнинг ўйин фалсафасини ҳам яхшилаб ўргандик. Тактик схемалари борасида ҳам етарли маълумотларга эга бўлдик. Биз энг кучли гуруҳдан ўрин олдик. Аниқ айта оламанки, ушбу гуруҳдан ўрин олган тўрт терма жамоадан бири учта йўлланмадан бирини қўлга киритади. Қолаверса, бундай қисқа муддатли турнирларга алоҳида тайёргарлик кўриш керак. Ҳар бир ўйин муҳим аҳамиятга эга. Шунинг учун, ҳар бир рақибимизга қарши, ҳар бир ўйинга худди финалда ўйнаётгандек тушамиз”, - деди Самвел Бабаян.

Самвел Бабаян: Олимпия терма жамоасининг вазифаси Рио йўлланмасини қўлга киритиш