Максимилиан Фомин мухлисларни ҳақорат қилгани учун кечирим сўради

Ўзбекистон олимпия терма жамоаси ҳимоячиси Максимилиан Фомин ўзбекистонлик ишқибозлардан узр сўради.

Ўзбекистон ОТЖ 16 январь куни Ироққа ютқазиб қўйиб, Рио-2016 умидидан маҳрум бўлишганидан кейин терма жамоа футболчиси Фомин футбол сайтлари ва ижтимоий тармоқлардаги мухлисларнинг танқидлари ҳамда ҳақоратларига ўзининг фейсбукдаги саҳифаси орқали ҳақоратли сўзларни йўллаганди.

Унинг мурожаати ишқибозларнинг кескин норозилигига сабаб бўлди. Бугун эса Фомин Фейсбук орқали мухлислардан кечирим сўради.

"Қадрли дўстлар. Менинг ёзганларим бизга чин қалбдан ва юракдан мухлислик қилган ҳақиқий ишқибозларга тегишли эмас. Сизга чин дилдан миннатдорчилик билдирамиз ва ишончингизни оқламаганимизни биламан. Биз ҳам сиз каби жонажон Ўзбекистонимиз олимпиадага боришни истагандик, аммо бундай бўлиб чиқмади. Яна бир марта такрорлайман - бу спорт, бу ўйин, унда барча нарса сен ўйлаганингдек бўлавермайди. Мен ҲАҚИҚИЙ ишқибозларимиздан самимий узр сўрайман. Мен сизларни хафа қилишга ҳаққим йўқ эди. Мен буни истамагандим. Менинг мурожаатим бизнинг шаънимизга ахлат ағдарган ва ҳамон бу ишни қилаётганларга айтилганди", деб ёзилади иккинчи мурожаатда.