АҚШда қувноқ қуллар ҳақидаги китоб сотувдан олиб ташланди

АҚШда “Жорж Вашингтоннинг туғилган кунига балиш” номли болалар китоби сотувдан чиқарилди. The Independent нашрининг маълум қилишича, ижтимоий тармоқларда ушбу китоб қувноқ руҳда эканлиги ҳамда қулдорлик тарихини бўяб кўрсатгани туфайли кескин танқид остига олинган.

Scholastic нашри томонидан чоп этилган расмли китобнинг бош қаҳрамони – қора танли қул Геркулес қизи Делия билан АҚШнинг биринчи президенти Жорж Вашингтоннинг туғилган кунига пишириқ тайёрлайди. Китоб реал воқеаларга асосланиб ёзилган.
Айрим тармоқ фойдаланувчиларининг фикрича, китоб қаҳрамонлари жуда қувноқ ва ҳаётдан мамнун қилиб тасвирланган, бу эса болаларда қулдорлик даври ҳақида янглиш тасаввур ҳосил қилиши мумкин.

“Муаллиф, рассом ва муҳаррирнинг ишига ҳурмат билан қараган ҳолда, қуллик даҳшатлари ҳақида қўшимча тарихий маълумотларсиз нашр болаларда қулларнинг ҳаёти ҳақида янглиш тасаввур уйғотиши мумкин, шу боис уни сотувдан олиш лозим”, - дейилади Scholastic компаниясининг хабарномасида.

Китоб муаллифи Рамин Ганешрам CBS Diversity платформасидаги блогда танқидга жавоб бериб, уларни реал фактлардан қочиб, тарихга бир ёқлама ёндашишдан огоҳлантирди.