Гуанчжоунинг собиқ мэри 11,8 миллион доллар пора олганликда айбланмоқда

Хитойнинг Гуанчжоу шаҳри(Гуандун провинцияси маъмурий маркази)га раҳбарлик қилган Цао Цзяньляо 76,96 млн юан ($11,8 млн) миқдорида пора олганликда айбланмоқда. Бу ҳақда 30 январь куни Синьхуа агентлиги хабар қилди.

Мазкур иш Шэньчжэнь (Гуандун провинцияси) шаҳрининг ўрта даражали халқ суди томонидан кўриб чиқилмоқда. Прокуратура вакиллари Цао Цзяньляони ердан фойдаланиш, шаҳарсозлик сиёсати ва муҳандислик ишларини бошқариш соҳаларида мансабини суиистеъмол қилишда айбламоқда. Тергов маълумотларига кўра, у уч кишининг манфаатлари учун пора олган.

Хабарда келтирилишча, суд қилинаётган шахс дастлабки мажлисда ўз айбини тан олган. Цао Цзяньляо 2007 йилдан вице-мэр лавозимида ишлаган. Унгача эса Гуанчжоу ва унинг туманлари маъмуриятларида турли мансабларда фаолият кўрсатган.