Тошкент шаҳар мудофаа ишлари бошқармаси йиғин пунктида муддатли ҳарбий хизматга чақирилган йигитларнинг дастлабки гуруҳини тантанали кузатиш маросими бўлиб ўтди.
ЎзА хабарида келтирилишича, Тошкент шаҳар ҳокими ўринбосари, шаҳар хотин-қизлар қўмитаси раиси Ф.Абдураҳимова, Тошкент шаҳар мудофаа ишлари бошқармаси бошлиғи Э.Тоштемиров ва бошқалар Президентимиз Ислом Каримов раҳнамолигида Қуролли Кучлар тизимида амалга оширилаётган ислоҳотлар самарасида Ўзбекистон профессионал тайёргарликка эга, яхши таъминланган, Ватанимизга садоқатли, мамлакатимизнинг хавфсизлиги ва ҳудудий яхлитлигини, чегараларимиз дахлсизлигини таъминлаш, халқимизнинг тинч ва осойишта ҳаётини ҳимоя қилишга қодир бўлган миллий армиясига эга эканини таъкидлади.
Ёшларни муддатли ҳарбий хизматга танлов асосида саралаб олиш учун чақирув ва йиғин пунктларида барча қулайликлар яратилган. Чақирув комиссиялари фаолиятининг ошкоралиги ва унинг иши устидан самарали жамоатчилик назоратини таъминлаш мақсадида улар таркибига жойлардаги давлат ҳокимияти органлари, кенг жамоатчилик, “Камолот” ёшлар ижтимоий ҳаракати, Хотин-қизлар қўмитаси, “Нуроний” жамғармаси ва “Маҳалла” хайрия жамоат фонди вакиллари ҳам жалб этилган. Мудофаа вазирлиги ҳузуридаги Жамоатчилик кенгаши чақириққача бўлган ёшларнинг маънавий-ахлоқий ва ҳарбий-ватанпарварлик жиҳатдан шаклланишига кўмаклашмоқда.
Муддатли ҳарбий хизматга йўл олаётган ёш йигитларга мудофаа ишлари бошқармаси, жамоат ташкилотлари вакиллари, ота-оналар оқ йўл тилади.