Ўзбекистон ва Россия ўзаро театр гастроллари ўтказишни режалаштирмоқда

Ўзбекистон ва Россия ўзаро театр гастроллари ўтказишни режалаштирмоқда, деб хабар бермоқда Россия маданият вазирлиги матбуот хизмати.

26 февралда Москвада ишчи учрашув бўлиб ўтиб, унда Россия ва Ўзбекистон ўртасида ўзаро театр гастроллари ўтказиш масаласига тўхталиб ўтилди. Тадбирда Россия маданият вазирининг ўринбосари Александр Журавский ва Ўзбекистоннинг Россиядаги элчихонаси маслаҳатчиси Равшанбек Алимов иштирок этди.

"Мен Ўзбекистоннинг маданият соҳасида ҳамкорликни давом эттириш ва оширишга қизиқишини тасдиқлашни истардим. Россия маданияти, рус маданияти бизнинг маданий ҳаётнинг ажралмас таркибий қисми ҳисобланади", деб айтди Равшанбек Алимов.

Алимов Россия маданият вазирлигига Россиянинг машҳур театрлари, жумладан Россия Давлат академик Катта театрининг Ўзбекистонга гастроллар уюштиришида кўмак кўрсатиш илтимоси билан мурожаат қилди. Алимовнинг айтишича, Ўзбекистон спектакллар ўтказиш учун барча шароитларни таъминлашга тайёр. Шунингдек, Россияда Ўзбекистон театрларининг жавоб гастролларини ўтказиш режалаштирилмоқда.

Журавский икки томон учун маъқул муддатларда гастроллар ташкил этиш учун бу масалани Россия театрлари билан муҳокама қилишга ваъда берди.