Тошкентда ўтказилаётган 16 ёшгача бўлган футболчилардан ташкил топган терма жамоалар ўртасидаги “Эртанги кун спорти” номли халқаро футбол фестивалининг иккинчи тур ўйинлари бўлиб ўтди.
Дастлабки турда Темур Олимхўжаев бошчилигидаги Ўзбекистон ўсмирлар терма жамоаси Туркманистон вакилларини йирик — 5:1 ҳисобида мағлуб этган эди. Иккинчи учрашувда Япония ҳамда Эрон жамоалари 0:0 ҳисобида дуранг натижа қайд этди.
2 март куни эса иккинчи тур ўйинлари бўлиб ўтди. Дастлаб, Япония U-16 терма жамоаси туркманистонлик тенгдошларини 1:0 ҳисобида мағлубиятга учратди.
“Жар” стадионида бўлиб ўтган куннинг иккинчи ўйинида эса Ўзбекистон U-16 терма жамоаси Эрон ўсмирларига қарши майдонга тушиб, 2:1 ҳисобида ғалаба қозонди.
Олимхўжаев шогирдлари ўйинда биринчи бўлиб гол ўтказиб юборди. Учрашувнинг 14-дақиқасида Намдари жарима майдони ичидан кучли зарба йўллаб, ҳисобни очди. Биринчи бўлим Эрон фойдасига ҳал бўлди.
Ўзбекистон ўсмирлар терма жамоаси иккинчи бўлим аввалидаёқ ҳисобни тенглаштирди. Расул Йўдошевнинг ажойиб тўп узатиши натижасида Абдунозир Абдураҳмонов дарвозабон билан яккама-якка вазиятга чиқиб кетди ва қийинчиликсиз дарвозани аниқ нишонга олди — 1:1.
Ўйиннинг 67-дақиқасида яна Расул Йўлдошев ҳужум бошлаб, Абдураҳмоновни қулай вазиятга олиб чиқди. Абдунозир йўллаган зарба бартараф этилди, аммо тўп Шухрат Неъматовга келиб тушди. Неъматов эса уни дарвозага аниқ йўллаб, жамоасига ғалаба келтирган голга муаллифлик қилди — 2:1.
Ушбу халқаро ўртоқлик турнирининг сўнгги ўйинлари 4 март куни бўлиб ўтади. Унда Ўзбекистон ўсмирлар терма жамоаси Японияга қарши ўйин ўтказади.
4 март
11:00 Эрон U16 – Туркманистон U16
15:00 Ўзбекистон U16 – Япония U16
Таъкидлаш керакки, ушбу турнир Ўзбекистон ўсмирлар терма жамоаси учун шу йилнинг сентябрь ойида бўлиб ўтадиган Осиё чемпионатига тайёргарликнинг бир босқичи вазифасини ўтаб бермоқда.