«Квант» электрокари тўхтамасдан 14 соат юрди

Лихтенштейнда жойлашган nanoFlowcell компанияси «квант» электрокари Quantino’ни синовдан ўтказганини маълум қилди. Машина тўхтамасдан 14 соат давомида синалди. Янги машинанинг серияолди версияси Женева автосалонида намойиш қилинди.

Цюрихдаги полигонда бўлиб ўтган синовларда nanoFlowcell’нинг бош муҳандиси Нунцио Ла Веккья иштирок этди. У машинани полигон бўйлаб 14 соат давомида 74 км/соат билан ҳаракатлантирди.

Синовдан кейин прототипнинг 175 литрли бензин баклари яна 78 фоизга тўлиқ бўлган. "Машина яна ҳаракатланиши мумкин эди, бироқ машинадан фарқли ўлароқ, менинг имкониятларим чекланган", деб айтди Ла Веккья.

NanoFlowcell Quantino купеси ҳар бири 109 от кучига эга бўлган 4 та электромотор билан жиҳозланган. Двигателлар ион суюқлик билан тўлдирилган идишга эга иккита аккумулятордан энергия олувчи суперконденсаторлардан қувватланади.

Компания машинани кам нусхада серияли тарзда ишлаб чиқармоқчи. Бироқ компания аввал синов ўтказиб, электрокарни ишлаб чиқариш иқтисодий томондан оқилона эканлигини аниқламоқчи.

Женева автосалонида, шунингдек, компаниянинг Quant F Evolution концептуал суперкари намойиш қилинди. Умумий қуввати 1090 от кучини ташкил қилувчи 4 та двигатель билан жиҳозланган прототип 100 км/соат тезликка 2,8 сонияда эришишга қодир, максимал тезлиги эса соатига 280 км ни ташкил қилади.