21 март куни Apple компанияси анъанавий гаджетларининг тақдимотини ўтказади. Бош янгилик – бу кучли техник хусусиятларга ва ёқимли нархга эга экрани 4 дюймли янги iPhone SE смартфони ҳисобланади.
Шунингдек, компания iPad Pro'нинг кичиклаштирилган русумини ва Apple Watch учун аксессуарларни тақдим этади. «Kun.uz» жамоаси янги қурилмалар атрофида айланаётган барча миш-мишларни бир мақолага жамлади.
iPhone SE
Март ойида Apple ўз тақдимотида iPhone 7'ни намойиш этмаслиги аниқ эди, чунки анъанавий равишда компания янги авлод смартфонларини кузда намойиш этади. Лекин тармоқларда 2014 йилдан буён компания қурилманинг кичиклаштирилган русумини тақдим этиши ҳақидаги миш-мишлар кенг тарқалганди.
Яқин кунларда экрани 4 дюймли янги iPhone'нинг номи iPhone 5SE (Special Edition сўзидан қисқартма) деб номланиши мумкинлиги ва iPhone 6 дизайнидан бир қанча кўчирмалар бўлиши тўғрисида қизғин суҳбатлар бошланиб кетди.
Кейинроқ эса, тахмин қилинган номдан 5 рақамини олиб ташлашди. Унинг ташқи кўриниши эса iPhone 5S дизайнининг қисмлари қўшилиши ҳақида хабарлар тарқалди. Янги iPhone SE охирги флагман смартфон каби, кумушранг, кулранг, пушти ва олтинрангларда сотувга чиқарилади.
Техник жиҳатларга келадиган бўлсак, қурилма компаниянинг ҳозирча охирги ҳисобланган процессори A9 ва M9 билан, камера эса 12 мегапикселли матрица билан жиҳозланади.
4 дюймли экран «жонли расмлар»ни (Live Photos) кўрсата олсада, кенг реклама қилинаётган 3D Touch функциясига эга бўлмайди. Энг муҳим ўзгаришлардан бири, янги смартфон Apple Pay мобил тўловлар тизимини ишлатиш учун NFC-чипи билан қуролланади.
«Олмали» смартфон мухлислари учун яна бир муҳим хабарни 15 март куни Apple Insider тарқатди. Унга кўра, смартфон камераси 4K режимида тасвирга тушира олади.
Шунингдек, аккумуляторга ўзгартириш киритилиб, унинг ҳажми энди 1624 ёки 1642 мАс ни ташкил этади. Унинг нархи тахминан 400-500 доллар бўлиши кутилмоқда.
Apple Watch учун аксессуарлар
Компания тақдимотига таклиф этилган мухбирларнинг таклифномаларида кўпгина шамалар мавжуд. Энг эҳтимолий ишоралардан бири эса Apple Watch учун янги аксессуарлар тақдим этилиши бўлди.
Бундан ташқари, Чехиядаги Apple Store сайти олдиндан ақлли соатлар учун «милан ҳалқаси» (milanese loop) қўл бандининг янги русумини сотувга қўйди.
Шунингдек, тармоқдаги гап-сўзларга кўра, Буюк Британия ҳарбий-денгиз кучлари учун уч хил рангли билакузук ва «Hermes»дан янги чарм кўл бандлари тақдим этилиши кутилмоқда.
Apple Watch'нинг янги авлоди тақдимотини эса бир оз кутишга тўғри келади. Унинг намойиши кузда бўлиши мумкин.
Янги iPad Pro
Компаниянинг анъанаси нафақат кичик қурилмалар, балки катта қурилмаларни тақдим этиши ҳисобланади. Тармоқларда ўтган йили тақдим этилган iPad Pro'нинг янги русумини тақдим этиш режалаштирилганлиги тўғрисида хабарлар юрибди. Унга кўра, қурилма 9,7 дюйм экранли iPad Air 3 планшети бўлиши мумкин.
Биринчи профессионал қурилмадек, янги планшетда ҳам Apple Pencil'ни ишлата оласиз ва Smart Connector орқали симсиз клавиатураларни улай олиш мумкин бўлади, ҳамда қурилма иккита динамикларга эга бўлади.
Келажакда компания, фақатгина профессионал Pro ва Mini русумидаги плашетларни ишлаб чиқаришни режалаштирмоқда, чунки шу йўл орқали, планшетлар бозори қисқараётган пайтда, компания ўзининг харажатларини камайтиришни ўйламоқда.