ИШИД жангарилари АҚШнинг Ироқдаги ўт очишни қўллаб-қувватлаш базасига уч кун ичида иккинчи марта ҳужум қилди, деб хабар бермоқда CNN нашри.
АҚШ бошчилигидаги аксилтеррорчилик коалициясининг расмий вакили Стив Уорреннинг айтишича, 10 га яқин қуролланган жангари Firebase Bell базасига яқинлашмоқчи бўлган, улардан 2 нафари йўқ қилинган, қолгани эса яширинишга қарор қилган. Коалиция қўшинларидан ҳеч ким жароҳат олмаган.
Уорреннинг таъкидлашича, жангарилар вертолёт ва техниканинг ҳаракатланишини яққол кўриш мумкин бўлгани сабабли базанинг жойлашган ўрнини билади. “Сиз 200 пиёда аскарни яшира олмайсиз”, деб айтди Уоррен.
Базада пиёда аскарлардан ташқари, махсус бўлинмаларнинг 200 га яқин ҳарбийси ҳам бор.
Аввалроқ Ироқда янги очилган базанинг жангарилар томонидан ўққа тутилиши оқибатида бир нафар америкалик аскар ҳалок бўлгани маълум қилинганди. База террорчилар эгаллаган Мосул шаҳрига ироқлик ҳарбийларнинг ҳужумини артиллерия билан қўллаб-қувватлаш учун очилган.