Экспертлардан бири “Российская газета” нашрига 19 мартда Ростов-Донда Boeing 737-800 йўловчи самолётининг фалокатга учрашига техник носозлик – қотиб қолган баландлик рули сабаб бўлган бўлиши мумкинлигини айтди.
Самолёт қулашидан аввал бир километрга яқин баландликка кўтарилган, сўнгра кескин пастлашни бошлаган. Самолётнинг қулаш бурчаги 325 км/соат тезликда 45-50 градусни ташкил қилган. Экспертнинг айтишича, самолёт ерга деярли “тумшуғи билан шўнғиган”. Бу орада учувчилар ва диспетчерларнинг суҳбати аудиоёзуви фожиа вақтида учувчилар SOS ёрдам сигналини бермай, бу вазиятдан мустақил равишда чиқиб кетишга ҳаракат қилишганидан дарак беради.
Экспертнинг фикрича, баландлик рули ҳароратнинг кескин алмашиши туфайли совуқдан қотиб, тишлашиб қолган бўлиши мумкин. Учувчилар вақт ва кучлари етмагани сабабли рулни керакли ҳолатга қайтаришга улгура олишмаган бўлишлари мумкин.
Фожиа 62 кишининг умрига зомин бўлди.