Республикачилар партиясидан сайловолди жараёнларида етакчилик қилаётган Дональд Трамп НАТО’га ажратиладиган маблағни қисқартириш ва Украидаги вазиятни АҚШдан кўпроқ манфаатдор бўлган европалик иттифоқчиларга топширишни таклиф қилди.
“Украина – НАТОга аъзо мамлакатларга нисбатан бизни камроқ қизиқтиради. Нега Украина учун НАТО номидан Германия жавоб бермайди? Нега қўшни давлатлар у билан шуғулланмайди? Нега айнан биз Россия билан потенциал Учинчи жаҳон урушига олиб келувчи бўлишимиз керак?”, - деди Трамп Washington Post газетаси билан суҳбатда.
Кандидатнинг сўзларига кўра, АҚШ НАТОга харажатларини камайтириши лозим. Трамп Американинг Тинч океани ҳудудидаги ҳаракатлари хусусида ҳам шундай фикр билдирган эди. Унинг сўзларига кўра, 19 триллион доллар қарзи бор АҚШ миллиардлаб маблағни хорижга сарфлаётгани мантиққа тўғри келмайди.
Шу ўринда Трамп президентликка сайланса, Исроил билан иттифоқ тузмоқчилигини маълум қилди. Унинг сўзларига кўра, у яҳудий мамлакатни БМТнинг ҳар қандай тазъйиқидан муҳофаза қилади ва АҚШ элчихонасини Тель-Авивдан пойтахт Қуддус (Иерусалим)га кўчиришини билдирди.