Брюссель шаҳрининг «Андерлехт» жамоасида легионер сифатида фаолият кўрсатиб келган аргентиналик ҳужумчи Матиас Суарес 22 март кунги терактлардан кейин Бельгияни бутунлай тарк этмоқчилиги ҳақида айтиб берди.
«Фожиа юз берган вақтда мен уйда эмасдим. Машғулотларга кетаётганимда радио орқали терактлар ҳақида эшитдим. Бу жуда даҳшатли эди.
Мен дарҳол қизимга қўнғироқ қилдим ва унинг ҳолидан хабар олдим. У хавфсизликда эканини билдирди. Машғулотларимиз бекор қилингач, оиламга қайтдим. Оила аъзоларим жуда қўрқиб кетишганди.
Париждаги терактлардан кейин Бельгияда ҳам кўп нарса ўзгарди. Энди одамлар савдо марказларида ва кўчаларда гавжум бўлиб юришмайди. Кўпчилик уйидан камдан-кам ҳолатлардагина чиқади.
Брюсселда жангариларга ва бошқа жиноий гуруҳларга алоқадорлиги гумон қилинадиган кўплаб кишилар яшайдиган туман ҳам бор.
Мавсум якунида мен «Андерлехт»ни тарк этаман. Гарчи мен Бельгия ва бельгияликларни севсамда шундай қиламан.
Мен рафиқам ва ўз агентим билан бу масала бўйича гаплашдим. Яқинларимнинг хавфсизлиги учун июнда кетишга қарор қилдим», – дейди Суарес.
Венсан Компани: «Ҳозир Бельгия учун жудаям оғир вазият, аммо биз ўзимизни қўлга олишимиз керак»
Бельгия термаси аъзоси: «Бельгия шок ҳолатида, мамлакатда хаос юзага келган»