Евро-2016 ўйинларига соябонлар ва лазер указкалар олиб келиш тақиқланади

Францияда бўлиб ўтадиган футбол бўйича Европа чемпионати ташкилотчилари мухлисларга стадионларга туалет қоғози, лазер указка ва соябонлар олиб келишни тақиқлашди. Бу ҳақда 10 июнда маълум қилинди.

Стадионга олиб кириш тақиқланган буюмлар рўйхатига шунингдек дронлар, шлемлар, ҳар қандай идиш (жумладан, қоғоз идиш), пиротехниканинг барча тури, мегафонлар ҳамда шовқин чиқарувчи электр ва механик қурилмалар киритилди. Мухлислар ўйинларга эни, баландлиги ва чуқурлиги 25 сантиметрдан ошмайдиган сумкалар олиб келишларига рухсат берилди. Шунингдек, байроқларнинг эни ва баландлиги мос равишда 2 метрга 1,5 метрдан ошмаслиги керак.

Бундан ташқари, мухлисларга ўзлари билан алангаланувчи суюқликлар, спиртли ичимликлар, гиёҳванд моддалар, санчувчи ва кесувчи буюмлар, исталган турдаги қурол ва профессионал видеотасвир қурилмаларини олиб келиш ҳам тақиқланди.

Евро-2016 учрашувлари 10 июндан 10 июлгача Франциянинг 10 та шаҳрида бўлиб ўтади. Мусобақа финали 10 июлда Франциянинг бош футбол майдони "Стад-де-Франс"да бўлиб ўтади. Шу майдонда Францияга жаҳон чемпионлигини олиб келган 1998 йилги жаҳон чемпионати финали бўлиб ўтган.