Обама Трампнинг гапларига кесатиқ билан жавоб берди

Фото: Jimmy Kimmel / Twitter

АҚШ президенти Барак Обама АҚШ президенти лавозимига номзод Дональд Трампнинг гапларига комик Жимми Киммел шоуси эфирида изоҳ берди. Обама иштирокидаги бу шоудан парча бошловчининг твиттер-аккаунтида чоп этилган.

Айни вақтгача 8 мингта лайк ва 6 мингта репост тўплаган роликда Обама Mean Tweets рукни доирасида унга фойдаланувчилар юборган хабарларни ўқиётганда улар орасида Трампнинг расмий аккаунти @realDonaldTrump’дан жўнатилган хабар ҳам бўлган. "Обама АҚШ тарихига энг ёмон президент сифатида киради", деб айтилган Трамп хабарида.

"Нима ҳам дердим, @realDonaldTrump, жуда бўлмаса мен тарихга президент сифатида кираман", деб жавоб берган Обама Трамп ҳеч қачон президент бўла олмаслигига шаъма қилиб. Шундан кейин Обама хабарларни ўқиётган iPhone’ни ерга ташлаган.