«Ой нури» фильми «Олтин глобус» мукофотини «Энг яхши драма» йўналишида қўлга киритди. У Мел Гибсоннинг «Виждон нуқтаи назаридан», Гарт Дэвиснинг «Шер», Дэвид Маккензини «Исталган йўл билан» ва Кеннет Лоннерганнинг «Денгиздаги Манчестер» картиналарини ортда қолдирди.
Кейси Афллек эса «Денгиздаги Манчестер» фильмидаги роли учун энг яхши драматик актёр деб тан олинди.
«Энг яхши драматик актриса» йўналишидаги мукофот Изабель Юпперга «У» фильмидаги роли учун топширилди. У бу номинацияда Натали Портман («Жеки»), Эми Адамс («Келиш»), Жессика Честейн («Мисс Слоун») ва Рут Неггани («Севиш») ортда қолдирган.
Режиссёр Пол Верховеннинг «У» фильми «Олтин глобус»ни «хорижий тилдаги энг яхши фильм» номинациясини қўлга киритди. Шунингдек, бу йўналишда Уд Беньяминнинг «Илоҳийлар», Чили киноижодкорлари томонидан яратилган «Неруда», режиссёр Марен Аденинг «Тони Эрдманн» ҳамда эронлик режиссёр Асқар Фарҳодийнинг «Сотувчи» картиналари совринга эгалик қилиш учун тақдим этилганди.
«Ла-Ла Ленд» мюзикли режиссёри Дэмьен Шазелл «Олтин глобус»ни «Энг яхши режиссёр» йўналишида қўлга киритди. Бу номинацияда Мэл Гибсон («Виждон нуқтаи назаридан»), Том Форд («Тун қоронғусида») ва Барри Женкинс («Ой нури») номзодлари ҳам қўйилганди.
Британия қироллик оиласи ҳақидаги «Тож» эса «энг яхши драматик сериал» йўналишида ғолиб топилди.
Шунингдек, таниқли актриса Мерил Стрипга кинематографияга қўшган ҳиссаси учун Сесиль Б. Де Милль соврини топширилди.
Тўлиқ метражли "Ҳайвонлар шаҳри" мультфильми эса 2016 йилнинг энг яхши анимацион картинаси деб топилди.
