Jaguar компанияси ўзининг илк электр кроссовери I-Pace’нинг серияли тарзда ишлаб чиқариладиган версиясини жорий йил охиригача тақдим қилади. Инглиз маркасининг матбуот хизмати берган хабарда ушбу моделдаги автомобиллар 2018 йил иккинчи ярмидан бошлаб сотилиши айтилган. Jaguar I-Pace’нинг асосий рақобатчиси Tesla Model X кроссовери бўлади. Автомобиль Австриядаги Magna Steyr заводида йиғилади.
"Бу модел устида ишлаш давомида биз анъанавий қоидаларга қарши бориб, суперкар ташқи кўринишига, спорткар динамикаси ва электр приводга эга автомобиль яратдик", деб айтган Jaguar’нинг дизайн бўйича директори Ян Каллум.
Айни вақтда Jaguar кроссоверни Лондон кўчаларида синовдан ўтказди. Прототипнинг узунлиги 4680 миллиметрни, эни 1890 миллиметрни ташкил қилади. Ғилдираклар базаси 2990 миллиметрга тенг. Автомобиль иккита юкхона (530 литрли орқа ва 28 литрли олд), йўғон ғилдираклар аркаси, диффузор ва 23 дюймли ғилдирак дисклари билан жиҳозланган. Машинанинг серияли тарзда ишлаб чиқарилувчи версияси концептдан деярли фарқ қилмайди.
