Футбол шиорлари эркакнинг комадан чиқишига ёрдам берди

Британияда оғир дардга чалинган эркак севимли футбол жамоасининг шиорларини эшитгач ҳушига келди. Бу ҳақда Metro нашри хабар бермоқда. 

Нашрнинг таъкидлашича, Плимут шаҳрида яшовчи Тони Кемп бош мия қон томирлари аневризмини бошдан кечирган. Шифокорлар 59 ёшли Кемпни қутқариб қолишга муваффақ бўлишган, бироқ у кома ҳолатига тушган. Шифокорлар агар Кемп икки кун ичида ўзига келмаса, у ҳаётни таъминлаш тизимидан узиб қўйилишини айтишган.

"Мен ва фарзандларим уни ҳушига қайтариш учун у билан гаплашардик, қўлларини сиқардик, бироқ у қайтишининг ҳеч қандай аломати кўринмасди", деб эсламоқда эркакнинг рафиқаси Тони Данна.

Аёл деярли тақдирга тан бериб, турмуш ўртоғининг севимли футбол жамоаси "Плимут Аргайл"нинг шиорларини унга қўйиб беришга қарор қилган. Не ажабки, эркак шундан кейин ўзига келган.

Нашрнинг маълум қилишича, Тони жамоанинг содиқ мухлиси бўлган ва у иштирокидаги барча учрашувларни битта ҳам қолдирмай бевосита майдонда томоша қилиб келган.

"Плимут Аргайл" клуби Англия чемпионатининг биринчи лигасида (Премьер-лига ва чемпионшипдан кейин кучлилиги бўйича 3-лига) иштирок этади.