Тожикистон фуқароси трактор «тонировкаси» туфайли 340 долларлик жаримага тортилди

Скриншот: YouTube/Иллюстратив сурат

Тожикистонда «Т28» русумли трактор ҳайдовчиси транспорт воситаси деразасини ноқонуний равишда қорайтиргани учун 3 минг сомоний (340 доллар) миқдоридаги жаримага тортилди. Бу ҳақда тожик ОАВ хабар бермоқда.

Тожикистон Ички ишлар вазирлигидан хабар беришларича, Хатлон вилояти автомобиль инспекцияси бошқармаси ўтган ҳафта Душанбе-Қўрғон-тепа автомобиль йўлидаги рейд давомида «тонировка» қилинган трактор ҳайдовчисини ушлаган. У фақат қуёш нурларидан ҳимояланмоқчи бўлганини иддао этган.

Ушбу давлатда 2017 йилнинг 1 январидан автомобиль деразасини қорайтириш учун рухсатнома нархи қимматлашди – 25 фоизга. Бундай рухсатнома бир йил амал қилади, ҳамда хоҳловчилар уни узайтириш учун яна пул тўлашлари керак бўлади. Ушбу маблағлар эса 2010 йилдан бери Роғун ГЭС қурилишининг махсус ҳисоб рақамига ўтказилмоқда.