Франциялик дайди инкассаторлардан 300 минг еврони ўмариб кетди

Парижнинг Руасси–Шарль-де-Голль аэропортида маҳаллий дайди инкассаторлик идораси ичига кириб, у ердан 300 минг еврони олиб чиқиб кетди. Бу ҳақда Le Parisien нашри хабар бермоқда. 

Аэропортда жойлашган қимматбаҳо буюмлар сақланувчи идорада бир неча кун аввал сигнализация тизими ишлаб кетган. Воқеа жойига етиб келган полициячилар идоранинг эшиги очиқлигини, бироқ унинг ичида ҳеч ким йўқлигини аниқлашган.  

Кузатув камераларидан олинган ёзувлар текширилгандан кейин идорага дайди киргани аниқланган. У идора олдидаги чиқинди идишларини тимирскилаётганда бехосдан идора эшигига туртиниб кетган, эшик эса осонгина очилган.

Дайди ичкарига кириб, у ердан икки қоп пулни олганча номаълум томонга қараб жўнаб қолган.

Полициячилар аэропорт ҳудудида изғиб юрадиган бошқа дайдиларни сўроқ қилишган. Дайдиларнинг айтишича, гумонланувчи уларнинг орасида бошқа пайдо бўлмаган. “Энди унга чиқинди идишларини ковлаб юришга ҳожат қолмади”, деб киноя қилган терговчилардан бири.

Инкассаторларга нисбатан қандай чора кўрилгани ҳақида ҳеч нарса маълум қилинмаган.